Vil­hjálm­ur Theo­dór er nýr for­stöðu­maður sölu­stýr­ingar

Vilhjálmur Theodór Jónsson hefur verið ráðinn forstöðumaður sölustýringar hjá Verði tryggingum.

Hann kemur til Varðar frá Sýn, þar sem hann starfaði frá árinu 2016 í fjölbreyttum stjórnunar- og sölutengdum störfum. Hann hóf störf hjá Sýn sem viðskiptastjóri á fyrirtækjasviði, varð síðar deildarstjóri sama sviðs og hefur undanfarin ár gegnt starfi forstöðumanns sölusviðs með ábyrgð á sölu til einstaklinga. Hann býr því yfir víðtækri reynslu af sölustýringu, teymisstjórnun og þróun söluleiða í samkeppnisumhverfi.

Vilhjálmur lauk BA-prófi í stjórnmálafræði frá Háskóla Íslands árið 2016. Áður hefur hann einnig starfað við þjálfun samhliða því að spila í úrvalsdeild í körfubolta.

Í nýju starfi mun Vilhjálmur leiða starfsemi sölustýringar hjá Verði og bera ábyrgð á heildarstefnu og framkvæmd sölumála félagsins. Hann mun gegna lykilhlutverki í að móta og þróa sölustefnu Varðar og tryggja að sölustarfsemin styðji við markmið og gildi félagsins.

„Vilhjálmur Theodór er sannarlega góð viðbót í okkar öfluga teymi hjá Verði. Hann kemur inn með mikla reynslu af sölustýringu og skýra sýn á hvernig hægt er að styðja við viðskiptavini í að velja tryggingar sem henta þeirra þörfum. Ég er sannfærður um að hann muni styrkja sölustarf Varðar til framtíðar,“segir Einar Sigursteinn Bergþórsson, framkvæmdastjóri Sölu og ráðgjafar.