Bruna­varn­ir

Á hverju ári kemur upp bruni á heimilum sem veldur tjóni á íbúðum og innanstokksmunum og í sumum tilvikum heilsutjóni. Við leggjum mikla áherslu á að eldvarnir heimila séu í lagi enda er ávinningur góðra eldvarna margfaldur samanborið við þann skaða sem getur hlotist af eldi og reyk. Við höfum tekið saman nokkur góð ráð sem er mikilvægt að hafa í huga:

• Á hverju heimili skal vera a.m.k. 1 slökkvitæki og 1 reykskynjari. Við mælum með að reykskynjarar séu í sem flestum rýmum húsnæðis. Þá er góð regla að vera með slökkvitæki í bílskúrnum líka. Fáið ráðgjöf hjá sérfræðingum um hvaða skynjarar henta ykkar heimili.

• Setjið ykkur aldrei í hættu við að slökkva eld. Ef eldurinn er orðinn mikill skal leggja áherslu á að koma fólki út og loka rýminu ef hægt er til að hægja á útbreiðslu hans. Hringið strax á 112.

• Líftími reykskynjara eru um 10 ár og ef hann er að pípa þá er líklega kominn tími á að skipta um rafhlöðu.

• Hafið eldvarnateppi í eldhúsi og gasskynjara ef þið eruð með gaseldavél. Aldrei skal skvetta vatni á eld sem á upptök í feiti eða olíu. Það veldur sprengingu.

• Æskilegast er að geyma gas í vel loftræstum rýmum, helst úti í sér skáp.

• Fáið leiðsögn fagmanns við uppsetningu á hleðslustöð fyrir rafmagnsbíl.

• Í fjölbýli á að vera reykskynjari á hverri hæð í stigagangi. Notið ekki lyftur ef eldur kemur upp.

• Slökkvum á öllum raftækjum. Göngum vel frá sléttujárni, straujárni, eldavél og öðrum raftækjum.

• Gerið viðbragðsáætlun ef eld ber að garði. Hvernig skal bregðast við og hverjar eru flóttaleiðirnar.

Reykskynjarar

Reykskynjarar eru ódýr öryggistæki. Skerandi vælið í þeim getur bjargað mannslífum. Hafið eftirfarandi í huga um reykskynjara:

• Ekki staðsetja reykskynjara í eða of nálægt eldhúsi.

• Æskilegt er að setja reykskynjara í öll svefnherbergi.

• Best er að samtengja alla reykskynjara í húsinu.

• Sé húsið fleiri en ein hæð, setjið reykskynjara á allar hæðir.

• Reykskynjara ber að staðsetja í lofti, ekki nær vegg en 50 sentímetra.

• Skiptið um rafhlöðu í reykskynjaranum árlega t.d. 1. desember.

Prófið reykskynjarann mánaðarlega með því að ýta á prófunarhnappinn.

Eldvarnir eru dauðans alvara

Eldvarnabandalagið hefur gefið út handbók um eldvarnir heimilisins. Í henni er mælt með því að hafa reykskynjara í öllum rýmum, slökkvitæki við helstu flóttaleið og eldvarnateppi á sýnilegum stað í eldhúsi. Þá er brýnt að allir hafi að minnsta kosti tvær flóttaleiðir úr íbúðinni. Eldvarnabandalagið var stofnað sumarið 2010 sem samstarfsvettvangur um auknar eldvarnir og er Vörður aðili að bandalaginu.